Pedhalangan

Sengkuni Mantu

“Padha rungokna, gusti­mu ingkang sinuwun dhawuh marang bapa Begawan Druna kinen nglamar Dewi Antiwati putra putrine Paman Patih Sengkuni ing Plasajenar.”

“Nun inggih sandika, raden. Sawanci-wanci bidhal boten badhe nguciwani.”

“Lan maneh padha sikepa gegamaning yuda, aja nganti nguciwani. Apadene bu­dhale ngentenana  tengara. Bendhe se­pisan dandan, kapindho nglumpuk dene katelu budhal.”

“Sandika, raden!”

Untabing wadya Ngastina gumuruh swarane. Bendhe tinatap, gong maguru gangsa kateteg kaya butul-butula. Pasir lan lebu padha mumbul nalika barisan wadya bala Ngastina wiwit jumangkah. Gunging wadya tinon saking mandrawa pindha balaba walikenya. Balaba pun­dhung, walikenya laron, pindha laron metu saka brubulan. Amilir tanpa kendhat tanpa ana pedhote. Kelaping gendera, kaundha umbul-umbul mawarna-warna, pindha robing jalanidi.

Begawan Druna nylingker golek dalan liya. Tekan papan kang sepi banjur mateg aji pameling. Kencenging cipta kasil njamah wardaya kang kinanthen pamekas. Ora nganti asat riwe, dumadakan kumlebat sawijining wewayangan nyaket marang ratane Begawan Druna.

“Wonten dhawuh punapa dene Bapa Guru Druna nimbali kula, pun Dewasegara, saking negari Pulo Rajawedhi?” pitakone narendra kang anyar katon.

“Anak Prabu Dewasegara, sliramu taktimbali saperlu takjaluki sraya amrih ngamping-ampingi Kurawa kang ngirit Lesmana Mandrakumara tumuju Plasaje­nar saperlu nglamar Dewi Antiwati.”

“Sendika dhawuh, Bapa Guru. Kepa­reng kula mateg aji pameling ngetab wa­dya Pulo Rajawedhi amrih njampangi lampahipun barisan Ngastina.”

Dumadakan ketungka praptane Patih Sengkuni kang katon lungkrah

“Iya. Mangkono takwawas luwih prayoga.”

Begawan Druna bali menyang be­barisan Ngastina. Dene Prabu Dewase­gara enggal mateg aji pameling marang ka­dangira anom yakuwi Raden Dewasa­modra amrih ngirit wadya bala sagelar sepapan. Wadya saka Pulo Rajawedhi ora mung jalma manungsa, nanging ka­cam­puran raseksa. Mula bebarisan kapantha dadi loro. Sing siji pepanthan para ma­nungsa, dene kang sijine pepanthan bebarisan para raseksa.

Ora kaya kang ana tamansari Plasa­jenar. Dewi Antiwati nembe cangkrama kaliyan Patih Udawa. Janma kekalih kang katemben kasirep ing donyaning asmara katon sarwa endah kang rinumpaka. Gegelitaning manah anane amung seneng, adreng nedya enggal palakrama amrih enggal bisa nyecep jatinining kanikmatan.

Dumadakan ketungka praptane Patih Sengkuni kang katon……..