Hiburan.

Nglaras Endahing Wirama Diatonis lan Pentatonis

Sindhen lan pengrawit saka Semarang iki ditanggap ing pawiwahan ana Jakarta

Uyon-uyon utawa tetemba­ngan Jawa kanggoku bisa nuwuhake swasana tentrem. Rumangsaku kok kaya lagi lungguh ing ngiringan omah kanthi se­sawangan endah. Wayah awan rada su­muk nanging ana angin tumiyup. Tipas-tipas nanging kaselan nyruput teh anget.

Saiba senengku dene saiki ing sa­dhe­ngah papan, gamelan sasindhene katon sansaya aji. Ditanggap ana pawiwahan-pawiwahan ageng. Kaya ta kang nate dak­prangguli ing adicara ana Jakarta. Aku kober motret lan uga takon-takon. Je­bul sindhen kasebut sapengrawite asli Semarang.

Cascadance Trio nalika manggung ing Surabaya

ng kalodhangan liyane, sindhene sok-sok ana sing lemu jejer karo sing ayu. Dudu kok banjur sing lemu ora ayu. Nanging iki ngatonake wiwit ana rege­nerasi. Sing lemu iku maksude ya pan­cen wis ngumur, wis ibu-ibu. Nyandhing pawestri sing katon kinyis-kinyis mra­tandhani luwih enom.

Saliyane seneng uyon-uyon lan cam­pursari, aku uga bisa anteng jenjem nonton konser musik ala Eropa. Contone konser piano, biola, lan cello. Kaya kang tau dipitontonake ana Seraphim Music Studio, Surabaya. Kang main biola je­nenge Danny Ceri. Pawakane gedhe dhu­wur. Dene pemain cello rambute gon­drong digelung mendhuwur. Jenenge Ade Sinata. Pianise estri, pawakane se­dheng lan katon sumanak. Jenenge Airin Efferin.

Airin Efferin kang prigel mainake piano

Tetelune mujudake paraga kang si­nau musik ing Ngayogyakarta. Banjur nggawe grup iku, kang dijenengake Cas­cadance Trio. Prestasine Danny, Ade, lan Airin ing babagan musik uga akeh. Sali­yane ing tingkat nasional, para nom-nom­an kasebut wis kerep manggung ing njaban rangkah. Ing Surabaya, Casca­dance Trio mainake lagu Gypsy Trio by Haydn, Trio no 1 in F major anggitane Saint Saens, lan Four Seasons of Buenos Aires by Piazzola.

Lelorone hiburan kang dakcritakake mau, kanggoku nduweni kaunggulan dhe­we-dhewe. Akeh kang nganggep de­ne alat musik piano, biola, lan cello iku kapetung modern. Dene gamelan iku tradhisional.

Nanging miturut pamawasku ora mangkono. Piano, biola, cello mbiyene saka tlatah Eropa. Dene gamelan saka Nus­wantara. Ing asale kana, tetelu alat musik iku wis ana kawit biyen. Mula ton­tonan utawa konser-e ya wis dadi tradhi­si. Tetembangan kang dimainake ana sing klasik, kontemporer (campuran), lan modern. La, gamelan ing jaman saiki uga asring kanggo ngiringi tembang-tembang anyar, kaya dene pop, kepara malah rock.

Saiba senengku mangerteni akeh paraga mudha kang remen gamelan lan uyon-uyon

Kang mbedakake, miturut wawasan­ku, perangan unine. Piano, biola, cello, mujudake alat musik diatonis. Dene ga­melan kalebu pentatonis. Diatonis iku, dhasare ana pitung nada (titi laras). Kaya kang dimangerteni, c d e f g a b  utawa sok diunekake do re mi fa sol la si.

Dene pentatonis dilongi loro, mula mung ana lima. Yaiku, yen dipadhakake titi laras diatonis, ana  kang sinebut laras slendro. Dene nadane yaiku c d e g a c. Sijine maneh yaiku c e f g b c kang di­arani laras pelog. Saliyane gamelan Ja­wa, alat musik pentatonis uga ana ing Tiongkok. Kaya ta gucheng utawa siter Ti­ongkok lan rebab.

Danny Ceri, pemain biola kang gagah iku pranyata isih enom

Sanadyan beda cacah titi larase, na­nging ora ateges diatonis lan pentatonis ora bisa dimainake bareng. Kepara saiki akeh kang nggawe aran­semen musik cam­puran, nganggo gamelan lan piano, biola, cel­lo, uga trompet. Hya pancen ora gampang. Kena diarani kerja pindho, amarga perlu nyelarasake antarane kang pitung nada karo limang titi laras.

Kang wis tau daktonton kreasine Djaduk Ferryanto ing Ngayogya. Malah wektu iku ora mung gamelan Jawa, na­nging uga ana saka Bali. Jian apik tenan. Saliyane ngli­pur, uga nuwuhake rasa mong­kog. Dene para seniman nuswan­tara ora kalah prigel klawan seniman ting­kat internasional. Mula, ayo para mu­dha aja cilik atine. Gaweya kreasi kang edi peni. Ora mung babagan musik, nanging uga maneka warna miturut ka­remane dhewe-dhewe.  (Lanny/SDN Sempor I)